Return to site

بُرشام الأفكار

Super She

إنك تشتغل في إدارة مدرسة و في نفس الوقت تسيب بصمة إيجابية بشكل مُستديم في نفوس كُل الناس اللي بتتعامل معاهم... حاجة من أصعب ما يكون...

ده غير المواقف الصعبة اللي بتتحط فيها كُل شوية بشكل يومي و

تتطلب منك حِكمة في رد الفعل و إتخاذ القرار....

يا تري دايماً هتقدري تسيبي بصمة بشكل صحيح؟

يا تري دايماً قرارك هيبقي في محله؟

إزاي عقلي ينتج أفكار مُفيدة وقت ما احتاجها؟

اسئلة كانت دايماً بدورلها علي إجابة لحد من سنتين فاتوا لما تعرضت لحاجة مُهمة جداً من خلال دراساتي و لما بدأت أطبقها.... حصل إختلاف كُلّي و جزئي في كُل جوانب حياتي و حياة آخرين كمان...

إزاي أتواصل مع قوة عقليةموجودة جوة كُل حد فينا و أستخدمها وقت اللزوم بالشكل اللي أنا محتاجاه بالظبط؟

الكلام اللي هكتبه حالاً هيوضح كيفية التواصل مع القوّة العقلية اللي موجودة جوّانا علشان نتمكّن من إنتاج الأفكار بشكل يومي و إتخاذ القرارات بشكل سريع و أكثر حِكمة ;)

و السبب كان عدم ثقتي في التفكير بالطريقة القديمة خلاص و خصوصاً لو أثبتت فشل عند مُعظم الناس أكثر ما أثبتت نجاح... يبقي انا محتاجة طريقة تفكير جديدة أقدر أطوّر بيها من أفكاري و أخليها مُتجددة علشان أقدر أطوّر من نفسي أولاً و بعدين من أولادي ثم الآخرين بشكل عام.

حتي في الحياة اليومية العادية... كمية المواقف اللي بنتعرضلها مع القُريبين مننا قبل الغُرب عننا... بتخلينا فاقدين القُدرة بنسبة كبيرة علي إنتاج الأفكار لإيجاد الحُلول حتي في ابسط المواقف اللي بنتحط فيها, طول ما احنا مش بندخّل علي عقلنا معلومات جديدة يومية يتدرّب عليها علشان يعرف إزاي يشتغل وقت اللزوم.

إحنا بنسبة كبيرة جداً... منيمين عضلات عقلنا علي الآخر و مش بننتج منها إلا التفكير المُتعارف عليه.... اللي إتربينا عليه ....بالرغم إننا مُعترضين عليه..... تفكير القوالب... إعمل يابني زي ما كُله بيعمل.... مع إنك لو فضلت نايم في السرير لأيام مثلاً من غير ما تحرّك عضلات جسمك و تشغلها....هتسبب أذي بالغ واضح لكُل عضلات جسمك, فما بالك بعضلات عقلك؟!! مابتشغلهاش بشكل مُفيد ليه؟ ايه اللي مانع سيادتك؟

علاج في أفكارهُم 

أغلب الناس محتاجة عِلاج لأفكارهم اليومية بسبب عدم التدريب اليومي علي إنتاج الإفكار اللي بيعملوه بشكل مُذهل ده.

العلاج مُهم و محتاجينه جداً علشان نقدر نتعامل مع بديهيات الحياة اللي مابقيناش عارفين نتعامل معاها من سوء معاملتنا لعقولنا اللي صعبانة عليا دي.

أفكارك تزوّد فلوسك

دي حتي الفلوس بتتصرف و بتضيع في اللا شيء غالباً و مابقاش فيها بركة

إنما أفكارك الكويّسة هتوديك لأفكار احسن.... هتعرّضك لخبرات أفضل....هتوفّرلك وقتك و فلوسك....هيظهرلك ناس عايزة تدفعلك فلوس علشان تستفيد بأفكارك, فهتغيّر حياتك و تزوّد فلوسك

سوف الموضوع سهل إزاي :D

ادخل و العب جوة عقلك شوية

علي وعد منّي إنك لما تِفتح عقلك و تلاعبه شوية تمرينات يومية خفيفة...انك هتبقي و لا أي أي و لا زي زي :D

كُل موقف هتتعرضله كبير كان أو صُغير... هتلاقي كمّية أفكار مش طبيعية بتتنطور من عقلك بتطرطش ع اللي حواليك :D

كُل إجتماع هتحضره في شُغلك...هيبقي حاجة كده اللهم صل ع النبي

out of the box :D

لو الفلوس عجّزت معاك.... هتلاقي بتاع تلاتين اربعين فِكرة إزاي تعمل فلوس بشكل مُبتكر و سهل

طريقة اللعب بتبقي إزاي؟

إتفرج علي أي مادة عِلمية بتحبها... فيديو تثقيفي... ديني.... تنمية بشرية... اي حاجة

أو

إقرأ كام صفحة من مجلّة....كتاب....مُدوّنة....من كِتاب الدين.... كُتب ولادك اللي بيذاكروا منها في اي مادة

الوقت

من عشرة لعشرين دقيقة بالكتير

و بعدين

هات كُراسة شيك شُياكة و حِلوة حلاوة و إبتدي إكتب فيها كُل يوم

تكتب أكتر الحاجات اللي علّقت معاك و انت بتلاعب عقلك و بتدربه علي إستقبال معلومة جديدة و تشغيلها جوة و إنتاج ما يُمكن إنتاجه بقي.... رأيك.... إنطباعك....حاجة نوّرت جوة و انت بتقرأ او بتتفرج....جُملة تكتبها كدة زي ما هي....تكتب خواطر مُعينة جوة عقلك...... المُهم تكتب لحد عشر أفكارمش أقل من كدة

عشر أفكار..... يااالهوي :D

هو انت فاهم ان الدنيا سهلة و لا ايه؟ :D
مش لازم العضلة اللي جوة عقلك دي تلعبها صح و تشتغل مظبوط و لا ايه؟

في الأول هتلاقي العضلة كسلانة و مش هتنتج إلا اربع او خمس أفكار و دُمتم علشان مش قادرة تقوم من مكانها و تتلحلح :D

فأنت لازم في اللحظة دي تضغط عليها بقي.... عضلة عقلك علي ماتعودها أكابتن :D

زيها زي جسمك بالظبط و انت بتدرب في الجيم.... العضلات بتبتدي تشتغل و جسمك يعرق و يطلع معاه سموم و حوارات من الجسم بعد ما تدوس شوية في التمرين, مش بعد اول خمس دقايق خلاص هتبقي فان دام :D

نفس الذات نفس بيحصل جوة العقل.... العضلة مش هنتنتج أفكار بشكل مظبوط لو ماتدربتش بشكل مظبوط

اقفش الفِكرة و طبّقها

بعد ما تكتب أفكارك بشكل مُنمق و جميل... إقراهم تاني و إختار فِكرة واحدة بس و أشتغل عليها و حاول تفتكرها و تطبقها كُل يوم و تبني عليها حِتة زيادة كمان. يعني حاول تنفذ و تجوّد من عندك في واحدة من العشر أفكار.

سهلة مش كدة :D

فِكرتين في الحِلال

كُل شوية هيحصل تزاوج لفكرتين جوة عقلك و ينتُج عنهم فِكرة جديدة لانج بتاعتك انت بقي و نِتاج تزاوج أفكارك

و من هِنا بيحصل التطوّر الفِكري, و الناس الغريبة اللي بعيد عننا دي بتخترع و بتكتشف و بتعمل حاجات كدة ماعديتش علي دماغنا قبل كدة.... هو ده بقي السبب اللي بيخليهم يطلعوا بأفكار جديدة تغيّر العالم من حواليهم و تخلف جيل جديد من الأفكار المُطورة اللي كان مصنعها جوة عقل واحد زي حضرتك.

تبتدي منين

تكتب في كُراستك الشياكة كبداية الآتي:

  • أحسن عشر كُتب قرأتهم
  • عشر مُميزات فيك
  • عشر عيوب عندك
  • عشر أسباب علشان تعيش حياتك بشكل أفضل
  • عشر عادات غذائية صحية
  • عشر حلول لمشكلة وقعت فيها زمان
  • عشر حاجات تقدر تعملهم بشكل مختلف النهاردة
  • عشر حاجات بتحبهم في أولادك
و هكذا

حياتك هتتغيّر كُل ست شهور

فوق كُل الإستفادة اللي أنا ذكرتها فوق دي هتلاحظ حاجة مُهمة جداً لاحظتها عن نفسي من ساعة ما بدأت أطبق الخطوات دي....

هتلاقي تغيّر خُرافي بيحصل في كُل جوانب حياتك الفِكرية و العملية و الشخصية و كُل حاجة إييية :D

و تبتدي بقي تبقي القُدوة اللي إحنا بندوّر عليها و مش لاقيينها يا جدع :D

ده انت مُمكن أصلاً يتكتب إسمك في التاريخ بعد ما يعدّي عليك ست شهور ف ست شهور و تبقي زي آينشتاين و لا توماس إيديسون :D

الله.... و همّا أحسن منك في ايه و لا أحسن منك ف ايه... غاية ما هُنالك إنهم يعني كانوا بيشغلوا دماغهم شوية.... و ايه يعني... بكرة نشغل دماغنا و نبقي أجدع من المهاتما غاندي بذات نفسيته :D

شغل دماغك و شوف ايه اللي فيها

ده ربنا ميّزنا عن سائر المخلوقات بيها

All Posts
×

Almost done…

We just sent you an email. Please click the link in the email to confirm your subscription!

OK