Return to site

الفشل جزء مُهم من عملية النجاح

Super SHE

الفشل في بداية الزواج

التصرفات العادية اللي فيها ضيق أفق مُميت مني كزوجة طبعاً كان سمة من سماتي الشخصية.... :D
تصرفاتي تلات تربعها مش من دماغي, من دماغ كُل من هب و دب معدّي في الشارع.... آخد بكلامه و أنفذ فاغلط فتحصل مُشكلة تعلّم قيّا و علياّ و خصوصاً إني أصلاً أتجوزت و خلّفت و أنا لسّه في الجامعة!

و من أبرز الحاجات اللي كُنت فاشلة فيها فشل ذريع مثلاً هو الخِناق بشكل مُستمر علي حاجة مع زوجي عارفة إنه بيحبها و مش هيبطّلها و لا بالطبل البلدي ( السفر من حين لآخر مع أصحابه مثلاً... كُل ما ييجي مسافر, أتخانق قال يعني لو اتخانقت هيبطّل يسافر مع أصحابه :D

فتبقي النتيجة إنه بيسيبني أتفلق... فأحس بالظُلم و القهر.... و نفضل فترة كبيرة مابنتكلمش.... لحد ما نتلكك علي اي حاجة و نتكلم.... و إحنا لسه شايلين اللي إتقال في وقت الزعل لبعض.... علشان بعد شوية يجد نفس الحاجة اللي بيحبها و اللي في نفس ذات الوقت أنا مش متقبلاها... فنتخانق.... فاتفلق... فيزيد الضغط علينا إحنا الإتنين و نفضل نعيد و نكرر في نفس المشهد المُتكرر...

طيب إيه؟!

مافيش نهاية لدايرة العذاب دي؟

أطلع منها إزاي؟

أحل مشاكلي اللي يوم عن يوم بتزيد إزاي؟

الفشل في بداية تربيتي لأولادي

و بما إني أتجوزت صُغيرة... فخلفت إبني الكبير آدم و أنا لسه واحد و عشرين سنة... عيلة صغيرة معاها عيّل صغير و يُفترض إنها تربيه كويس!!! و كعادتنا المُعتادة... اللي ليه فيه و اللي مالوش فيه بيتدخل في تربيتك لأولادك... أيوة أولادك لإني كام سنة و جيبت ليليا و بقيت أم و بتربي و بتاع :D

تعملي ايه يا نُهي تعملي إيه يا قلبي....؟

أسمع كلام الكُبار اللي عايزين يدلعوا و خلاص و أصلاً مُقترحاتهم مش دايماً بتبقي لايقة علي الزمن اللطيف اللي إحنا فيه ده

طيب أسمع كلام دماغي و أمشي بدماغي و اللي يزعل يزعل!!!!

لأ أنا أتجنب كُل الصفات الوحشة اللي بشوفها في ولاد الناس التانية و يبقي عندي عُقدة بشنيطة و هلع من كُل حاجة ولادي داخلين عليها أو عايزين يعملوها

أيوة..... أنا ازعق و أضرب و أبهدل علشان يخافوا يغلطوا أصلاً....

و لا المدارس و إختيارها و المُذاكرة و اللي إخترعها و العيشة و اللي عايشينها

كميّة تحديات و مشاكل وقعت و وقّعت ولادي فيها معايا بنت لذينة و أنا بسأل نفسي....جري ايه؟! هو مافيش طريقة مُحترمة أربي بيها العيلين اللي ربنا رزقني بيهم دول ولا ايه؟؟؟ ده انا كُنت فاكرة ان الدُنيا هتبقي وردي وردي وردي وردي وردي تيرارارارا لكن للأسف ماطلعتش كدة نُهاااائي

عايزة أطلع من اللي أنا فيه لإني كدة بأذي نفسي و بأذي ناس تانية كمان كدة

الفشل في بداية شُغلي في التدريس

إتخرجت زي أي بني آدمة مُحترمة و روحت قدّمت في مدرسة مُحترمة و دبلومة أمريكانية و حركات علشان يبقي ليّا شُغلي و برستيجي و الحياة تحلوّ بقي و تبقي تمام, لكن كالعادة مش بتلاقي في السِكة السعادة. نِجحت في المُقابلات و الإمتحانات و الحركات الأولانيات و بعدين أتاخدت من الدار للنار.... مش عارفة مين فين ليه :Dأفتكر مرّة دخلت الفصل في البداية و لقيت الدُنيا جوة اييييه مراجيح مولد النبي.... قمت نافشة ريشي بقي و مزعقة قال يعني هيسكتوا :D

الجميل في الموضوع إني و أنا بزعق... الطلبة بيعملوا أصوات في النُص صريخ علي زعيق علي هووووب علي فرقعة علي شقلبظات و أنا مش عارفة أعمل ايه :D

طبعاً كانت غلطة و أدركتها بعد ما عملتها... و كالعادة رميت اللوم علي الطلبة و العيال اللي مش متربية من وجهة نظري وقتها... روحت لرئيسة القسم اللي كُنت فاهمة إن في معاها عصاية سحرية هتحللي بيها الواقعة السودا اللي انا فيها... لقيتها بتقوللي مشاكلك حليها بنفسك!!! و العيب عيب مُدرس مش طالب و كلام كتير كدة يدُل علي إني أنا اللي بنت ستين ف سبعين و لازم ألاقي حل للخروج من الأزمة...

طيب الحل ده فين؟؟؟؟

و أروحله إزاي؟؟؟

في ميكروباظ بيوصل لأي حلول طيب؟؟؟ :D

الفشل في بداية شُغلي في الإدارة

قعدت سبع سنين بلاد تشيلني و بلاد تحطّني في مجال التدريس لحد ما زوجي العزيز قرر يبني مدرسة و مايستأمنش حد غير زوجته العزيزة اللي من حُسن حظه إنها بالبلدي كدة بتشتغل في مطبخ المدارس بقالها سنين و كان شايف من برة برة كدة إنها متميزة بشكل ما في شُغلها, فقال انتِ انتِ و مافيش غيرك انتِ اللي هيمسك إدارة المدرسة الجديدة اللي لسّه بتقول يا هادي!!

الأزمة بقي في إنك تكون بتشتغل في إدارة مدرسة... هو إنك بتعاني من مشكلة قائمة بشكل داااائم و مستديم مابين كُل الناس اللي فوق دي....

يعني دايماً في مُشكلة قائمة ما بين إدارات المدارس و اولياء الأمور من أجل اللا شئ كدة :D

المُدرسين دايماً عندهم إحساس قااائم و مُتأكدين منه إن إدارات المدارس بتمُص دمهم و بتديهم ملاليم في الآخر

الطلبة بيمثلوا مسرحية مدرسة المُشاغبين بشكل مُستمر و عايزين مُدرسين من عينة سهير البابلي وقتها

أولياء الأمور أغلبهم عاملين زي حالاتي كدة في الأول.... في اللي أدرك ان في مُشكلة وبدأ يشتغل عليها... و في اللي لسه ما أدركش و شكله مش ناوي :D

حطيلي الكوكتيل الظريف ده مع بعض علي بعض و قوليلي يلا حبيبتي إشتغلي و خلّي الناس دي كُلها تبقي مرضية علشان سُمعة مدرستك تبقي معديّة من غير ما عقلك يبقي مهلبية :D

دي لوحدها كانت فقرة في حياتي مش عادية :D

و علشان ألاقي حل يُرضي جميع الأطراف علشان أقدر أنجح و يبقي ليّا معالم و نظام...... دي كانت حكاية تقشعر لها الأبدان :D

طيب و يا تري في الآخر لقيت حل علشان اطلع من اللي أنا فيه ده؟؟؟

لقيت حلول كتيرة نورت ليّا الطريق و حولتني لزوجة, أم, مُدرسة, مُديرة ناجحة و قادرة تصمد و تعدّي و تمشي من كويس لأحسن

الحلول دي هاقولكم عليها أكيد قُدام, و لكن ماكنش ينفع نغفل أبداً إن الفشل هو جزء من منظومة النجاح

في أسرار كتير مخفية عن النجاح

هتلاقيها مستخبية جوة الفشل

All Posts
×

Almost done…

We just sent you an email. Please click the link in the email to confirm your subscription!

OK